വാസ്തു എന്ന സംസ്‌കൃത പദത്തിന്‌ പൊതുവായി 'പാർപ്പിടം' എന്നാണ് അർത്ഥം. വാസ്‌തുവിനെ ധര (ഭൂമി) ഹർമ്മ്യം (കെട്ടിടം) യാനം (വാഹനം) പര്യങ്കം (കിടക്ക) എന്നിങ്ങനെ നാലായി വിഭജിച്ചിരിക്കുന്നു (മാനസാരം).
ഭൂമിയുടെ ആകൃതി ഗോളം ആണെങ്കിലും വീട് വയ്ക്കാനുള്ള സ്ഥലത്ത് (വസ്തു) സൂര്യന്‍ ഉദിക്കുന്ന ദിക്കിനെ ആധാരമാക്കിയുള്ള ഒരു ചതുരം (സമചതുരം) സങ്കല്പിച്ചാണ് വാസ്തു മുന്നോട്ടു പോകുന്നത്. വീട് പണിയുന്നതിലെ പ്രായോഗിക തത്വങ്ങള്‍ ആണ് ഇതിന്‍റെ അടിസ്ഥാനം. ഇപ്രകാരം, അടിസ്ഥാനപരമായി വടക്ക്, കിഴക്ക്‌, തെക്ക്, പടിഞ്ഞാറ്‌ എന്നീ നാലു ദിശകളിൽ നിന്നു പ്രസരിക്കുന്ന ഊർജ്ജത്തെ വാസ്തുശാസ്ത്രം പരിഗണിക്കുന്നു. എങ്കിലും കോണുകള്‍ക്കാണ് ഏറെ പ്രാധാന്യമുള്ളത്. കാറ്റിന്‍റെ ഗതിയാണ് ഒരു പ്രധാന ഘടകം. വീടിനുള്ളില്‍ സൂര്യപ്രകാശത്തിന്‍റെ ലഭ്യതയാണ് മറ്റൊരു ഘടകം. ഇവ കൂടാതെ മനുഷ്യന്‍റെ നിത്യ കൃത്യങ്ങളും ആഹാരം പാചകം ചെയ്യുന്നതും വളര്‍ത്തു മൃഗങ്ങളെ പരിപാലിക്കുന്നതും എല്ലാം കണക്കാക്കിയാണ് ഒരു ഗൃഹം നിര്‍മ്മിക്കുന്നത് എങ്ങനെ എന്ന് തീരുമാനിക്കുന്നത്. കൂടാതെ ജല ലഭ്യത, കിണറിന്‍റെ സ്ഥാനം എന്നിവയും പരിഗണിക്കുന്നു. സ്വസ്ഥതയുള്ള ജീവിതം എന്ന സങ്കല്പത്തില്‍ പഴയ കാലത്തെ സമൂഹ കേന്ദ്രങ്ങളായ ദേവാലയം, വ്യാപാര സമുച്ചയം, നാല്‍ക്കവല തുടങ്ങിയവയില്‍ നിന്നും നിശ്ചിത അകലം പാലിക്കണം എന്നതും നിഷ്കര്‍ഷിച്ചിട്ടുണ്ട്. കൂടാതെ വനം, പാറക്കെട്ടുകള്‍, ഉല്‍ക്കാപതനം ഉള്ള പ്രദേശം എന്നിവയും താമസ യോഗ്യമല്ല. ഇവയ്ക്കെല്ലാം ശാസ്ത്രീയ അടിസ്ഥാനവും ഉണ്ടല്ലോ.
പ്രപഞ്ചത്തിലെ വിവിധങ്ങളായ ഊർജ്ജങ്ങളെയും മനുഷ്യനിലും അവന്‍റെ ചുറ്റുപാടുകളിൽ നിന്നും പുറപ്പെടുന്ന ഊർജ്ജത്തെയും തമ്മിൽ ബന്ധപ്പെടുത്തിയാണ്‌ വാസ്‌തുവിലെ ഊര്‍ജ്ജ തത്വങ്ങള്‍ ചിട്ടപ്പെടുത്തിയിരിക്കുന്നത്‌. സൗരോർജ്ജം മാത്രമല്ല വൈദ്യുതി, കാന്തികം, ഗുരുത്വാകർഷണം തുടങ്ങിയ ഘടകങ്ങളേയും വാസ്തു പരിഗണിക്കുന്നുണ്ട്‌. വാസ്തു ശാസ്ത്ര പ്രകാരം വീട് നിര്‍മ്മിച്ചാല്‍, അവിടെ വസിക്കുന്ന മനുഷ്യരുടെയും മറ്റു ജീവികളുടെയും ഊര്‍ജ്ജ നിലയും പ്രാപഞ്ചിക ഊര്‍ജ്ജവും തമ്മില്‍ ഒത്തു ചേര്‍ന്ന് പോവുകയും ഐശ്വര്യം വര്‍ദ്ധിക്കാന്‍ ഇട വരികയും ചെയ്യും എന്നാണ് പ്രമാണം. ഊര്‍ജ്ജ സ്ഥാനങ്ങളെ വീടിന്‍റെ മൂലകളില്‍ കേന്ദ്രീകരിച്ചിരിക്കുന്നതായി സങ്കല്പിക്കുന്നു. അതിനാലാണ് വീടിന്‍റെ നാല് മൂലയും എന്നും പ്രകാശം കടന്നു ചെല്ലുന്ന ഇടങ്ങളായി സംരക്ഷിക്കണം എന്ന് പറയുന്നത്. വീടിന്‍റെ മൂലകള്‍ ഇരുളടഞ്ഞു കിടക്കുന്നത് താമസക്കാരുടെ ആരോഗ്യത്തിനും സമ്പത്തിനും ദോഷം ചെയ്യുമെന്നാണ് വിശ്വാസം. എന്നാല്‍ പൊതുവേ ജനവാസം കുറവായിരുന്ന കാലത്ത് ഇഴജന്തുക്കളും വിഷ ജീവികളും മറ്റും ഇരുണ്ട മൂലകളില്‍ കയറിക്കൂടാനുള്ള സാധ്യത കൂടി പരിഗണിച്ചിരിക്കാം. ജനാലകളും വാതിലും വയ്ക്കുന്നതിലും അന്നത്തെ ജീവിത രീതി, കാലാവസ്ഥ എന്നിവ കണക്കിലെടുത്തിട്ടുള്ളത്‌ കാണാം.
വാസ്തു തത്വങ്ങള്‍ പല പ്രദേശങ്ങളില്‍ നിന്നും രൂപപ്പെട്ടു വന്നതിനാല്‍ പലതിനും ഗ്രന്ഥങ്ങളില്‍ നിന്നുള്ള പ്രമാണം ഉദ്ധരിക്കുന്നത് പ്രയാസമാണ്. മനുഷ്യാലയ ചന്ദ്രിക, ശില്പരത്നം, വിശ്വകര്‍മ്മ പ്രകാശിക തുടങ്ങിയവയാണ് ഇപ്പോള്‍ ഉപയോഗിച്ചു വരുന്ന പ്രധാന ഗ്രന്ഥങ്ങള്‍. ബുദ്ധമതത്തിലും ജൈന മതത്തിലും ഉണ്ടായിട്ടുള്ള പല കൃതികളും വിജ്ഞാന പ്രദവും ആശയ സമ്പന്നവും ആണെങ്കിലും കേരളം തുടങ്ങിയ സ്ഥലങ്ങളില്‍ അവയിലെ തത്വങ്ങള്‍ അത്ര പ്രായോഗികമല്ല.
(images:propertyessence.com)
No comments:
Post a Comment