ന: ഭൂമിര്‍ ന: ജലം ചൈവ ന: തേജോ നചവായ ച:
ന: ചാകാശം ന: ചിത്തം ച: ന:ബുദ്ധി ഘ്രാണഗോചര:
ന:ബ്രഹ്മേ:ന:വിഷ്ണുശ്ച: ന:രുദ്രശ്ച:താരക:
സര്‍വ്വശൂന്യനിരാലംബ: സ്വയംഭൂവിശ്വകര്‍മണ
(മൽസ്യ പുരാണം )
ശൂന്യതയില്‍ നിന്നും തുടങ്ങാം. ശൂന്യതയില്‍ നിന്നാണല്ലോ എല്ലാം സൃഷ്ടിക്കപ്പെടുന്നത്. സൃഷ്ടിക്കു മുമ്പ് സർവ്വവും ശൂന്യമായിരുന്ന അവസ്ഥയിൽ ശക്തി (ശബ്ദം) ബ്രഹ്മം ആയി. ഈ ബ്രഹ്മം അദൃശ്യവും നിരാലംബവും ആയി നിന്നു . വായു, ഭൂമി, വെള്ളം, തേജസ്സ്, ചിത്തം, ത്രിമൂര്‍ത്തികള്‍ (ബ്രഹ്മാവ്, വിഷ്ണു, രുദ്രൻ) പ്രകാശം (സൂര്യൻ, ചന്ദ്രൻ, നക്ഷത്രങ്ങൾ) എന്നിവയൊന്നും ഇല്ലാത്ത ഒരു അവസ്ഥയായിരുന്നു അന്ന്. അതിനാല്‍ ഈ ബ്രഹ്മം തന്നിലെ ആദിശക്തി, ഇച്ചാശക്തി, ജ്ഞാനശക്തി, ക്രിയാശക്തി, പരാശക്തി എന്നീ പഞ്ച ശക്തികളെ ജ്വലിപ്പിച്ചു. ഈ പഞ്ച ശക്തികള്‍ യഥാ ക്രമം സദ്യോജാതം, വാമദേവം, അഘോരം, തല്പുരുഷം, ഈശാനം എന്നി പഞ്ചമുഖങ്ങൾ ആയി. അങ്ങനെ കേവല ബ്രഹ്മം പഞ്ചമുഖ ബ്രഹ്മാവായി പ്രപഞ്ചത്തെ സൃഷ്ടിച്ചു എന്ന് മത്സ്യപുരാണത്തിൽ പറയുന്നു(കടപ്പാട്:Wkipedia). ബ്രഹ്മജാതനായ വിശ്വകര്‍മ്മാവാണ് പ്രപഞ്ചത്തിലെ സര്‍വ്വവും സൃഷ്ടിച്ചത്. അപ്രകാരം ആദി ശില്പി ശ്രീ വിരാട് വിശ്വകര്‍മ്മാവാണ്.
വാസ്തു രൂപകൽപ്പന ചെയ്യുന്നതിൽ, അറിവും അനുഭവ പരിചയവുമുള്ള നാല് ആചാര്യന്മാരുടെ നിര്‍ദ്ദേശങ്ങള്‍ നിര്‍മ്മിതിയില്‍ പരമ പ്രാധാന്യം അര്‍ഹിക്കുന്നു. സ്ഥപതി, സൂത്രഗ്രാഹി, തക്ഷകന്‍, വർധകി എന്നിങ്ങനെയാണ് വാസ്തുവിലെ നാല് ആചാര്യന്‍മാരെ നിശ്ചയിച്ചിട്ടുള്ളത്‌.
സ്ഥപതി (Sthapathy - The Architectural Designer)
നിര്‍മിതിയുടെ ആദ്യന്തം മനസ്സില്‍ കണ്ട് കണക്ക് നിശ്ചയിച്ച്, എല്ലാറ്റിന്‍റെയും മേല്‍നോട്ടം വഹിക്കുന്നയാളാണ് സ്ഥപതി. ദക്ഷിണ കേരളത്തില്‍ സ്ഥപതി കണക്കന്‍ എന്ന പേരിലാണ് അറിയപ്പെടുന്നത്. വടക്കന്‍ കേരളത്തില്‍ മൂത്താശാരി എന്നും (സര്‍വ വിജ്ഞാന കോശം). സ്ഥപതി കണക്കില്‍ മാത്രമല്ല ജ്യോതിഷത്തിലും വാന ശാസ്ത്രത്തിലും നിമിതതിലും ഒരു പരിധി വരെ വൈദ്യശാസ്ത്രത്തിലും അറിവുള്ള വ്യക്തി ആയിരിക്കണം. ഗൃഹകർത്താവിന്‍റെ ഇച്ഛയ്ക്കനുസരിച്ച് ഭംഗിയും ഉറപ്പും സൗകര്യങ്ങളുമുള്ള ഗൃഹം രൂപകല്പന ചെയ്യുകയും ഗൃഹത്തിലെ അംഗങ്ങളുടെ എണ്ണം അനുസരിച്ച് എത്ര വലിപ്പം വേണം, ഏത് ആകൃതിയിലായിരിക്കണം എന്നും മറ്റും ചിന്തിച്ച് തീരുമാനിക്കേണ്ടതും സ്ഥപതിയാണ്.
തച്ചുശാസ്ത്രത്തിന്‍റെ പ്രായോഗിക തലത്തിലാണ് അത് ജ്യോതിഷവുമായി ബന്ധപ്പെടുന്നത്,. ശാസ്ത്രവിധിയനുസരിച്ചുള്ള കർമങ്ങൾ സുമുഹൂർത്തത്തിൽ ആരംഭിക്കണം എന്ന് എല്ലാ വാസ്തു ശാസ്ത്രങ്ങളും നിഷ്കർഷിക്കുന്നുണ്ട്. മുഹൂർത്തം നിശ്ചയിക്കുന്നതിനുള്ള ശാസ്ത്രമാണ് ജ്യോതിഷം. ഗൃഹാരംഭം, മുഹൂർത്തശങ്കുസ്ഥാപനം, ശിലാസ്ഥാപനം, ദ്വാരസ്ഥാപനം, ശിഖര സ്ഥാപനം, ഗൃഹപ്രവേശം തുടങ്ങി അനേകം ചടങ്ങുകൾ ഗൃഹനിർമ്മാണവുമായി ബന്ധപ്പെട്ടു ചെയ്യേണ്ടതുണ്ട്. ഇതിന് ജ്യോതിഷത്തെ ആശ്രയിക്കുന്നു. സൂര്യന്‍റെ അയന ചലനം, മഴ, കാറ്റ് ഇവയുടെ ആഗമനം, ജലലഭ്യത ഇവയും കണക്കാക്കാന്‍ മൂത്താശാരിക്ക് അറിയണം. ഗൃഹം വയ്ക്കാന്‍ തെരഞ്ഞെടുക്കുന്ന ഭൂമി ആരോഗ്യപരമായി നല്ലതാണോ എന്നും അറിയണം. ഭൂപരിഗ്രഹം മുതൽ അനേകം താന്ത്രിക കർമങ്ങൾ നിര്‍വ്വഹിക്കേണ്ടതുണ്ട്. ഈശ്വര പ്രീതിക്കായുള്ള പൂജാ കര്‍മ്മങ്ങള്‍ നടത്താന്‍ താന്ത്രിക വിദ്യയിലും മൂത്താശാരിക്ക് പ്രാവീണ്യം ഉണ്ടായിരിക്കണം. ഗൃഹപ്രവേശത്തിനു മുൻപ് വാസ്തുബലിയും പഞ്ച ശിരസ്ഥാപനവും ചെയ്യണം (മുന്‍പ് വീട് സംബന്ധിച്ചുള്ള മുഴുവന്‍ പൂജകളും മൂത്താശാരിയാണ് ചെയ്തിരുന്നത്. നമ്പൂതിരിമാര്‍ ആരും തന്നെ വാസ്തുബലി ക്രിയ ചെയ്യാറില്ല. എന്നാല്‍ അടുത്ത കാലത്തായി ഈ പതിവില്‍ മാറ്റം വന്നിട്ടുണ്ട്). ഇപ്രകാരം ഒരു മഹാ പണ്ഡിതന് മാത്രമേ മൂത്താശാരി പദവി വഹിക്കാന്‍ കഴിയൂ. അദ്ദേഹം ഏകദേശം ഒരു യോഗിവര്യന് സമാനമായ ജീവിതം നയിക്കുന്നവന്‍ ആയിരിക്കുമെന്ന് മനസ്സിലാക്കാം. തച്ചു ശാസ്ത്രത്തിന് 'സ്ഥാപത്യവേദം' (അഥര്‍വം)എന്ന് പെരുവന്നതില്‍ നിന്ന് തന്നെ സ്ഥപതിയുടെ പ്രാധാന്യം വ്യക്തമാണ്.
സൂത്രഗ്രാഹി (Soothra Grahi- draughtsman & Supervisor)
സ്ഥപതിയുടെ മനസ്സിലുള്ള ഗൃഹത്തിന്‍റെ രൂപവും ഭാവവും ഉള്‍ക്കൊണ്ട് അളവുകള്‍ ക്രമപ്പെടുത്തുകയും പണികളില്‍ ആവശ്യമായ നിര്‍ദ്ദേശം നല്‍കുകയും ചെയ്യുന്ന ആചാര്യനാണ് സൂത്രഗ്രാഹി. 'സൂത്രം' എന്നാല്‍ ചരട് എന്നും കണക്കിലെ സൂത്രവാക്യം എന്നും അര്‍ഥം പറയാം. ഇത് രണ്ടും ഉള്‍ക്കൊള്ളുന്നവനാണ് സൂത്രഗ്രാഹി. പണികള്‍ നടത്തുന്ന സമയത്ത് എന്തെങ്കിലും മാറ്റം ആവശ്യം വന്നാല്‍ ആയതു മൂത്താശാരിയുമായി ചര്‍ച്ച ചെയ്തും കൈക്കണക്ക് പ്രകാരമുള്ള അളവില്‍ വ്യത്യാസം വരാതെ പ്രസ്തുത മാറ്റം വരുത്തേണ്ടതും സൂത്രഗ്രാഹിയാണ്. മൂത്താശാരി നിശ്ചയിക്കുന്ന ആളെ മാത്രമേ സാധാരണ സൂത്രഗ്രാഹിയായി വയ്ക്കാറുള്ളൂ. ചിലയിടത്ത്, മൂത്താശാരിയുടെ മകന്‍ തന്നെ ആയിരിക്കും ആ പദവി വഹിക്കുക. ഗൃഹം പണി തുടങ്ങുന്നതിനു മുന്‍പ് തന്നെ സൂത്രഗ്രാഹി വ്രതം ആരംഭിക്കേണ്ടതുണ്ട്.
തക്ഷകന്‍ (തച്ചന്‍) (Thakshakan - Carpenter)
രൂപമില്ലാത്തതിനു രൂപം കൊടുക്കുന്നവന്‍ എന്നാണ് 'തക്ഷ' എന്ന സംസ്കൃത പദത്തിന്‍റെ അര്‍ഥം. തക്ഷകന്‍ എന്നതിന് ദേവശില്പി എന്നും ആശാരി (ആചാരി) എന്നും സാമാന്യമായി അര്‍ഥം ഉണ്ട്. പേര് സൂചിപ്പിക്കുന്നത് പോലെ തന്നെ വ്രതവും ആചരണവും കൊണ്ട് പൂര്‍ണ്ണമാണ് തച്ചന്‍റെ ജീവിതം (പഴയകാലത്ത്). വലിയ മരം മുറിച്ചു ചെറുതാക്കി, കണക്കൊപ്പിച്ചു ചെത്തിയെടുത്ത്, ഭംഗിയില്‍ രൂപപ്പെടുത്തി, പരസ്പരം ചേര്‍ത്തുവച്ചു, ഉറപ്പിച്ച് തക്ഷകന്‍ ഗൃഹം നിര്‍മ്മിക്കുന്നു. ഗൃഹാരംഭം മുതല്‍ പണി തീര്‍ന്ന് ഗൃഹനാഥന്‍ ഏറ്റു വാങ്ങുന്നത് വരെ തച്ചന്‍ വ്രതം മുറിക്കരുത്. തച്ചന്മാര്‍ തന്നെയാണ് തടിയിലും ശിലയിലും കൊത്തുപണി ചെയ്തിരുന്നത്. ശിലയില്‍ കൊത്തുന്ന ആചാര്യനെ ശില്പി എന്ന് വിളിച്ചിരുന്നു. ശില്പി പണി ഏറ്റെടുത്താല്‍ വിഗ്രഹം പൂര്‍ത്തിയാകുന്നത് വരെ അയാള്‍ക്ക്‌ ബ്രാഹ്മണ സ്ഥാനം ആയിരുന്നു ലഭിച്ചിരുന്നത്. സൂത്രഗ്രാഹി നല്‍കുന്ന നിര്‍ദ്ദേശം അനുസരിച്ചാണ് ആശാരി അളവ് പണികളും കൊത്തുപണികളും ചിത്രപ്പണികളും ചെയ്യുന്നത്. മരം, ശില എന്നിവ കൂടാതെ ഓട് (മൂശാരി), സ്വര്‍ണ്ണം (തട്ടാന്‍മാര്‍ ), ഇരുമ്പ് (കൊല്ലന്മാര്‍) എന്നിവയില്‍ ശില്പങ്ങള്‍ തീര്‍ക്കുന്നവരും ആചാരങ്ങള്‍ അനുവര്‍ത്തിക്കുന്നവരും വിശ്വകര്‍മ്മ പരമ്പരയില്‍ പെട്ടവര്‍ തന്നെയാണ്. ഗൃഹനാഥന്‍റെ ധനസ്ഥിതി അനുസരിച്ച് ഇവരും ഒരു പരിധി വരെ നിര്‍മ്മാണത്തില്‍ പങ്കാളികളാകുന്നു. ക്ഷേത്ര നിര്‍മ്മാണത്തിലാണ് ഇവരുടെ ആവശ്യം കൂടുതലായി വേണ്ടിവരുന്നത് എന്ന് മാത്രം.
വര്‍ദ്ധകി (Vardhaki - Mason)
ശില്‍പികള്‍ കണക്കനുസരിച്ച് രൂപപ്പെടുത്തിയ ഘടകങ്ങള്‍ ചേര്‍ത്ത് വച്ച് അവ തമ്മില്‍ ഭംഗിയാം വിധം യോജിപ്പിച്ച്, സ്ഥപതി നിര്‍ദേശിച്ചിട്ടുള്ള രീതിയില്‍ ഗൃഹം രൂപപ്പെടുത്തുന്ന കര്‍മ്മമാണ്‌ വര്‍ദ്ധകിയുടെത്. അതായത്, രൂപപ്പെടുത്തിയ വസ്തുക്കള്‍ ചേര്‍ത്തുവച്ച് ഗൃഹം കെട്ടിപ്പടുക്കുന്നവനാണ് വര്‍ദ്ധകി. വര്‍ദ്ധകിയും വ്രതങ്ങള്‍ എടുത്തു മാത്രമേ ഗൃഹ നിര്‍മ്മാണം ആരംഭിക്കാവൂ. ഗൃഹത്തിന്‍റെ പണി മാത്രമല്ല. അതിനു ചുറ്റുമുള്ള പ്രകൃതിയെ അനുയോജ്യമായ രീതിയില്‍ ക്രമീകരിക്കുന്നതും(Landscaping) വര്‍ദ്ധകിയാണ്. ഗൃഹത്തിന്‍റെ സ്ഥിതി അഥവാ തുലനാവസ്ഥ (balance) നില നിറുത്തുക എന്നത് വര്‍ദ്ധകിയുടെ ഉത്തരവാദിത്വമാണ്. ഭാരക്രമീകരണം, തൂണുകളുടെയും ഭിത്തികളുടെയും ക്രമീകരണം എന്നിവയിലൂടെയാണ് ഇത് സാധ്യമാക്കുന്നത്. മുഴുവന്‍ ഗൃഹത്തെയും മനസ്സില്‍ കണ്ടുകൊണ്ടാണ് അദ്ദേഹം പണി ആരംഭിക്കുന്നത്. പണി തീര്‍ന്ന ശേഷം സ്ഥപതിയുടെ അനുവാദത്തോടെയാണ് വ്രതം മുറിക്കുന്നത്.
തച്ചുശാസ്ത്രജ്ഞര്‍ മേല്പറഞ്ഞ നാലുവിധം പ്രവൃത്തികളിലും വൈദഗ്ധ്യം നേടിയവരാണ്. സാധാരണയായി, അവരില്‍ ഏറ്റവും അനുഭവ പരിചയമുള്ള ആള്‍ സ്ഥപതിയും ഏറ്റവും കുറഞ്ഞയാള്‍ വര്‍ദ്ധകിയുമായി പ്രവര്‍ത്തിക്കുന്നു എന്ന് മാത്രം. മേല്പറഞ്ഞ നാല് ആചാര്യന്മാരെയും വേണ്ട രീതിയില്‍ ദക്ഷിണയും മറ്റ് സമ്മാനങ്ങളും നല്‍കി തൃപ്തിപ്പെടുത്തിയ ശേഷം മാത്രമേ ഗൃഹനാഥന്‍ ഗൃഹം കൈയേല്‍ക്കാന്‍ പാടുള്ളൂ എന്നാണ് പഴയ കാലത്തെ വ്യവസ്ഥ. .
(Images: commons.wikimedia.org)
